مسقط، دوحہ اور نئی دہلی کی کتاب نمائش کے سربراہان تہران کا دورہ کریں گے

مہر خبررساں ایجنسی کی رپورٹ کے مطابق، 34واں بین الاقوامی کتاب میلہ تہران کی آج صبح کی پریس کانفرنس، وزارت ثقافت کے نائب وزیر یاسر احمدوند اور خانۂ کتاب کے سی ای او علی رمضانی کی موجودگی میں مصلی امام خمینی رحمۃ اللّٰہ علیہ میں منعقد ہوئی۔

احمدوند نے پریس کانفرنس سے خطاب کرتے ہوئے کہا کہ کتاب نمائش 10 سے 20 مئی تک مصلی امام خمینی رحمۃ اللّٰہ علیہ میں "مستقبل پڑھنے والوں کا ہے" کے شعار کے ساتھ منعقد ہوگی۔ اس شعار کا مطلب ہے کہ ملک کا مستقبل پڑھنے پر منحصر ہے، کیونکہ تاریخی حقائق سے یہ بات واضح ہو جاتی ہے کہ کسی بھی معاشرے کی ترقی، زیادہ پڑھنے اور لکھنے پر منحصر ہوتی ہے۔ کتاب میلہ، کتاب خوانی کی عادت ڈالنے اور کتاب سے مانوس ہونے کا ایک موقع ہے۔ امید ہے کہ لوگوں کی بڑی تعداد میں شرکت سے پبلشرز کی اچھی خدمات سے لوگ آگاہ ہوں گے اور یہ نمائش گاہ ثقافتی اور سماجی ترقی میں مؤثر ثابت ہوگی۔